மேல் மாகாண பாடசாலைகளை ஆரம்பிப்பது தொடர்பில் 2 வாரங்களில் வழிகாட்டல் கோவை

மேல் மாகாண பாடசாலைகளில் அனைத்து தரங்களுக்கும் கற்றல் நடவடிக்கைகளை ஆரம்பிப்பது தொடர்பிலான சுகாதார வழிகாட்டல் கோவையை எதிர்வரும் இரண்டு வாரங்களுள் தயாரிக்கவுள்ளதாக கல்வி அமைச்சர் ஜி.எல். பீரிஸ் தெரிவித்துள்ளார்.

கொழும்பில் இன்று இடம்பெற்ற ஊடக சந்திப்பில் வைத்து அவர் மேற்கண்டவாறு தெரிவித்துள்ளார்.

மேல் மாகாணத்தில் பெரும்பாலான பகுதிகளில் பாடசாலைகளை திறப்பதற்கான சூழ்நிலைகள் அவதானிக்கப்பட்டுள்ளதாக அவர் சுட்டிக்காட்டியுள்ளார்.

மேல் மாகாண பாடசாலைகளில் அனைத்து தரங்களையும் 2 வாரத்திற்குள் ஆரம்பிப்பது தொடர்பான விசேட கலந்துரையாடல் நாளை மறுதினம் நடத்தபடவுள்ளது.

சுகாதார பிரிவு கொவிட் தொற்று பரவலை தடுக்கும் ஜனாதிபதி செயலணி உள்ளிட்ட பல பிரிவின் பங்களிப்புடன் இந்த பேச்சுவார்த்தை நடைபெற இருப்பதாக கல்வி அமைச்சர் பேராசிரியர் ஜி.எல் பீரிஸ் கூறினார்.

மேல் மாகாணத்தில் தனிமைப்படுத்தப்படாத பகுதிகளை தவிர ஏனைய பகுதிகளில் 11 ஆம் தரத்திற்கு மாத்திரம் எதிர்வரும் 25 ஆம் திகதி பாடசாலைகள் ஆரம்பிக்கப்படவுள்ளமை குறிப்பிடத்தக்கது